ରାୟଗଡ଼ା : ବଜ୍ରାଘାତରେ କାଶୀପୁର ବ୍ଲକ ଆଳୁତୁମ୍ବା ଗ୍ରାମର ୨ଭାଇଙ୍କ ମୃତ୍ୟୁ ଘଟିଛି। ଗାଈ ଚରାଇବାକୁ ଯାଇଥିବା ଅବସ୍ଥାରେ ସୁବାଷ ସିଂ ମାଝି ଓ ମାଙ୍ଗୁଡୁ ମାଝିଙ୍କ ମୃତ୍ୟୁ ଘଟିଥିବାବେଳେ ସେହି ଗ୍ରାମର ମାନ୍ଦୁରୁ ମାଝି ନାମକ ଆଉ ଜଣେ ଅହତ ହୋଇଥିବା ଜଣାପଡିଛି। ଏମାନଙ୍କ ମୃତ୍ୟୁରେ ଗାଁରେ ଶୋକର ଛାୟା ଖେଳିଯାଇଛି। କାଶୀପୁର ବ୍ଲକ ମାଣ୍ଡିବିଶି ଗ୍ରାମ ପଞ୍ଚାୟତ ଅନ୍ତର୍ଗତ ଆଳୁତୁମ୍ବା ଗ୍ରାମର ୩୦ବର୍ଷୀୟ ସୁବାଷ, ୨୬ବର୍ଷୀୟ ମାଙ୍ଗୁଡୁ ଏବଂ ୨୨ବର୍ଷୀୟ ମାନ୍ଦୁରୁ ସକାଳୁ ନିଜ ନିଜର ଗୋରୁଗାଈଙ୍କୁ ଧରି ଜଙ୍ଗଲକୁ ଚରାଇବାକୁ ଯାଇଥିଲେ। ସନ୍ଧ୍ୟା ପୂର୍ବରୁ ଫେରିବା ରାସ୍ତାରେ ପାଣିପାଗ ହଠାତ ପରିବର୍ତ୍ତନ ହୋଇଥିଲା।
ଆକାଶ ମେଘାଚ୍ଛନ୍ନ ହେବା ସହ ଘଡ଼ଘଡ଼ି ସହ ବଜ୍ରପାତ ହୋଇଥିଲା। ବଜ୍ରପାତରେ ଗୋରୁଗାଈ ଦୌଡିଦୌଡି ଗାଁ ମୁହାଁ ହୋଇଥିବାବେଳେ ପରିବାର ଲୋକେ ସୁବାଷ, ମାଙ୍ଗୁଡୁ ଓ ମାନ୍ଦୁରୁ ୩ଜଣଙ୍କୁ ଖୋଜିଖୋଜି ଯାଇ ଜଙ୍ଗଲରେ ପହଞ୍ଚିଥିଲେ। ଜଙ୍ଗଲ ଭିତରେ ୩ଜଣ ତଳେ ପଡିରହିଥିବା ଦେଖିବା ପାଇଥିବା ଗ୍ରାମବାସୀ କହିଛନ୍ତି। ତେବେ ଘଟଣାସ୍ଥଳରେ ସୁବାଷ ଓ ମାଙ୍ଗୁଡୁଙ୍କ ମୃତ୍ୟ ହୋଇଥିବା ବେଳେ ମାନ୍ଦୁରୁଙ୍କୁ ଗୁରୁତର ଅବସ୍ଥାରେ ଜଙ୍ଗଲରୁ ଉଦ୍ଧାର କରି ମାଣ୍ଡିବିଶି ପ୍ରାଥମିକ ଚିକିତ୍ସାଳୟରେ ଚିକିତ୍ସା କରାଯାଉଥିବା ଜଣାପଡିଛି।
