ଲିବିଆର ସଶସ୍ତ୍ର ସଂଘର୍ଷରେ ୨୦୫ ମୃତ; ଭାରତୀୟ ନାଗରିକଙ୍କ ପାଇଁ ସହାୟତାର ହାତ ବଢାଇଲା ଏମଇଏ

ତ୍ରିପୋଲି : ଲିବିଆ ରାଜଧାନୀ ତ୍ରିପୋଲିକୁ ନିଜ ନିୟନ୍ତ୍ରଣକୁ ନେବା ପାଇଁ ହାଫତାର ଲିବିଆନ ଜାତୀୟ ସେନା (ଏଲଏନଏ) ଏବଂ ଲିବିଆନ ସଶସ୍ତ୍ର ବାହିନୀଙ୍କ ମଧ୍ୟରେ ସଂଘର୍ଷରେ ଅନ୍ୟୁନ ୨୦୫ ଜଣଙ୍କ ମୃତ୍ୟୁ ଘଟିଥିବାବେଳେ ୯୧୩ ଜଣ ଆହତ ହୋଇଛନ୍ତି। ମିଳିତ ଜାତିସଂଘ ଅନୁବନ୍ଧିତ ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ ଏହି ସୂଚନା ଦିଆଯାଇଛି। ଏହାକୁ ନେଇ ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ (ଏମ୍‍ଇଏ) ଲିବିଆରେ ଥିବା ଭାରତୀୟ ନାଗରିକଙ୍କ ପାଇଁ ସତର୍କ ସୂଚନା ଜାରି କରିଛି। ବିଦେଶ ମନ୍ତ୍ରାଳୟ ମୁଖପାତ୍ର ରବିଶ କୁମାର ଲିବିଆରେ ଥିବା ଭାରତୀୟଙ୍କ ପାଇଁ ସହାୟତାର ହାତ ବଢାଯାଇଥିବା ଗୁରୁବାର ସୂଚନା ଦେଇଛନ୍ତି।
ସେ ଟ୍ୱିଟ୍‍ କରିଛନ୍ତି ଯେ ଲିବିଆରେ ଥିବା ଭାରତୀୟ ଦୂତାବାସ ଭାରତୀୟ ନାଗରିକଙ୍କ ପାଇଁ ସମସ୍ତ ପ୍ରକାର ସହାୟତାର ହାତ ବଢାଇଛି। ଲୋକେ ଲିବିଆର ସ୍ଥିତିକୁ ଅନୁଧ୍ୟାନ କରନ୍ତୁ। ପରିସ୍ଥିତି ବିଗିଡ଼ିବା ମାତ୍ରେ ଭାରତୀୟ ଦୂତାବାସ ହେଲ୍ପ ଲାଇନ ନମ୍ବର ୦୦୨୧୮୯୨୪୨୦୧୭୭୧ରେ ଯୋଗାଯୋଗ କରିବାକୁ କୁହାଯାଇଛି।
ଉଲ୍ଲେଖଯୋଗ୍ୟ ଯେ ଅପ୍ରେଲ ୪ରୁ ହାଫତାର ଲିବିଆନ ଜାତୀୟ ସେନା ଏବଂ ଲିବିଆନ ସଶସ୍ତ୍ର ବାହିନୀଙ୍କ ମଧ୍ୟରେ ସଂଘର୍ଷ ଚାଲିଛି। ଲିବିଆ ଏକଛତ୍ରବାଦ ଶାସକ ମୁଆମାର ଗଦାଫିଙ୍କ ମୃତ୍ୟୁ ପରଠାରୁ ଲିବିଆ ଦୁଇଟି ଦଳରେ ବିଭକ୍ତ ହୋଇଯାଇଛି। ଲିବିଆ ସଂସଦ ସମର୍ଥିତ ଲବିଆ ଜାତୀୟ ସେନା (ଏଲଏନଏ) ପୂର୍ବ ଲିବିଆକୁ ନିୟନ୍ତ୍ରଣରେ ରଖିଥିବାବେଳେ ମିଳିତ ଜାତିସଂଘ ସମର୍ଥିତ ମଧ୍ୟବର୍ତ୍ତୀକାଳନୀ ନ୍ୟାସନାଲ ଆକର୍ଡ ସରକାର (ଜିଏନ୍‍ଏ) ଲିବିଆର ପଶ୍ଚିମାଞ୍ଚଳକୁ ନିୟନ୍ତ୍ରଣରେ ରଖିଛି। ଏବେ ରାଜଧାନୀ ତ୍ରିପୋଲିକୁ ନିୟନ୍ତ୍ରଣକୁ ନେବା ପାଇଁ ଉଭୟ ଦଳର ସେନା ମଧ୍ୟରେ ସଂଘର୍ଷ ଚାଲିଛି।

Comments are closed.