ଆଜି ପ୍ରଧାନ ବିଚାରପତିଙ୍କ ଶେଷ କାର୍ଯ୍ୟଦିବସ, ଦେଶବ୍ୟାପୀ ବିଚାରପତିଙ୍କୁ ଦେବେ ଉଦବୋଧନ

ନୂଆଦିଲ୍ଲୀ: ଆସନ୍ତା ୧୭ ତାରିଖରେ ଭାରତର ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗୋଇଙ୍କ କାର୍ଯ୍ୟକାଳ ଶେଷ ହେଉଛି। ଏହି ଦିନ ସେ ପ୍ରଧାନ ବିଚାରପତି ପଦବୀରୁ ଅବସର ଗ୍ରହଣ କରିବେ। ତେବେ ଶୁକ୍ରବାର ସୁପ୍ରିମକୋର୍ଟରେ ଜଷ୍ଟିସ ଗୋଗୋଇଙ୍କର ଶେଷ କାର୍ଯ୍ୟଦିବସ ରହିଥିଲା। ତେଣୁ ସେ ସୁପ୍ରିମକୋର୍ଟର ୧ ନମ୍ବର ପ୍ରକୋଷ୍ଠରେ ଶେଷ ଥର ପାଇଁ ଖଣ୍ଡପୀଠରେ ସାମିଲ ହୋଇଥିଲେ। ସୁପ୍ରିମକୋର୍ଟର ୧ ନମ୍ବର ପ୍ରକୋଷ୍ଠଟି ପ୍ରଧାନ ବିଚାରପତିଙ୍କ ପାଇଁ ଉଦ୍ଦିଷ୍ଟ ଥିବାବେଳେ ଶୁକ୍ରବାର ଜଷ୍ଟିସ ଗୋଗୋଇ କେବଳ ୪ ମିନିଟ ପାଇଁ ଖଣ୍ଡପୀଠରେ ବସିଥିଲେ। ତାଙ୍କ ସହିତ ବିଚାରପତି ଏସ.ଏ. ବୋବଡେ ବି ସାମିଲ ଥିଲେ। ଖଣ୍ଡପୀଠରେ ଶୁଣାଣି ସମୟରେ ୧୦ଟି ମାମଲାରେ ପ୍ରଧାନ ବିଚାରପତି ନୋଟିସ ଜାରି କରିଥିଲେ।

ଏହି ଅବସରରେ ସୁପ୍ରିମକୋର୍ଟ ବାର୍‌ ଆସୋସିଏଶନ ଅଧ୍ୟକ୍ଷ ରାକେଶ ଖାନ୍ନା ବାର୍‌ ତରଫରୁ ପ୍ରଧାନ ବିଚାରପତିଙ୍କୁ କୃତଜ୍ଞତା ଜଣାଇଥିଲେ। ସୁପ୍ରିମକୋର୍ଟର ଜଣେ ଅଧିକାରୀ କହିଛନ୍ତି, ଜଷ୍ଟିସ ଗୋଗୋଇ ଦିଲ୍ଲୀର ରାଜଘାଟ ଯିବେ। ଗତବର୍ଷ ସେ ଶପଥ ଗ୍ରହଣ କରିବା ପରେ ବି ରାଜଘାଟ ଯାଇଥିଲେ। ରାଜଘାଟରୁ ଆସିବା ପରେ ପ୍ରଥାନ ବିଚାରପତି ସମସ୍ତ ହାଇକୋର୍ଟର ୬୫୦ ବିଚାରପତି ଏବଂ ୧୫ ହଜାର ନ୍ୟାୟିକ ଅଧିକାରୀଙ୍କ ସହିତ ଭିଡିଓ କନ୍‌ଫରେନ୍ସିଂ ଜରିଆରେ କଥା ହେବେ। ଏହି ଅବସରରେ ସେ ସମସ୍ତ ବିଚାରପତି ଏବଂ ନ୍ୟାୟିକ ଅଧିକାରୀମାନଙ୍କୁ ନିଜର କିଛି ବାର୍ତ୍ତା ପ୍ରଦାନ କରିବେ ବୋଲି ଆଶା କରାଯାଉଛି।