ନୂଆଦିଲ୍ଲୀ: ଆତଙ୍କବାଦୀ ସଂଗଠନ ଛାଡ଼ି ସେନାରେ ଯୋଗ ଦେଇଥିବା ଲାନ୍ସ ନାୟକ ନଜୀର ଅହମ୍ମଦ ବାନୀଙ୍କୁ ମରଣୋତ୍ତର ଅଶୋକଚକ୍ର ସମ୍ମାନରେ ସମ୍ମାନିତ କରାଯିବ। ଏହି ସମ୍ମାନ ଗଣତନ୍ତ୍ର ଦିବସରେ ତାଙ୍କ ପରିବାରବର୍ଗଙ୍କୁ ପ୍ରଦାନ କରାଯିବ। ଗତ ବର୍ଷ ନଭେମ୍ବରରେ ଶୋପିୟାନଠାରେ ଆତଙ୍କବାଦୀଙ୍କ ସହ ଚାଲିଥିବା ଗୁଳି ବିନିମୟରେ ନଜୀର ସହିଦ ହୋଇଯାଇ ଥିଲେ। ଏହି ଅପରେସନରେ ୬ଜଣ ଆତଙ୍କବାଦୀ ପ୍ରାଣ ହରାଇଥିଲେ।
କୁଲଗାମରେ ରହୁଥିବା ନଜୀର ବାନୀ ଏକ ସମୟରେ ଆତଙ୍କବାଦୀଙ୍କ ପ୍ରରୋଚନାରେ ସେମାନଙ୍କ ସହିତ ଯୋଗଦେଇ ଥିଲେ। ତେବେ ସେ ଜୀବନର ଚଲାପଥରେ ପରିବର୍ତ୍ତନ ଆଣି ୨୦୦୪ରେ ଟେରିଟୋରିଆଲ ଆର୍ମର୍ିର ୧୬୨ବି ବାଟାଲିୟନରେ ସାମିଲ ହୋଇ ଯାଇଥିଲେ। ପରିବର୍ତ୍ତୀ ସମୟରେ ତାଙ୍କୁ ୩୪ରାଷ୍ଟ୍ରୀୟ ରାଇଫଲକୁ ସ୍ଥାନାନ୍ତର କରାଯାଇ ଥିଲା। ସହିଦ ନଜୀରଙ୍କ ପରିବାରରେ ତାଙ୍କ ପତ୍ନୀ ଓ ୨ ସନ୍ତାନ ରହିଛନ୍ତି। ଆତଙ୍କବାଦୀଙ୍କ ବିରୋଧରେ ଏକାଧିକ ଅପରେସନରେ ନଜୀର ସାମିଲ ଥିଲେ। ୨୦୦୭ ଓ ୨୦୧୮ରେ ତାଙ୍କ ପରାକ୍ରମ ପାଇଁ ତାଙ୍କୁ ସମ୍ମାନିତ କରାଯାଇ ଥିଲା। ସେନାବାହିନୀର ପ୍ରବକ୍ତାଙ୍କ ପକ୍ଷରୁ ନଜୀରଙ୍କୁ ଜଣେ ଆଦର୍ଶ ସେନାର ଉଦାହରଣ ବୋଲି ଦର୍ଶାଯାଇ ଥିଲା।
