ଦୁଇ ଶିଶୁଙ୍କୁ ବଞ୍ଚାଇବାକୁ ଯାଇ ଜୀବନ ହାରିଲା ଲାଡେନ୍‌

ଯାଁଳା: ମଣିଷ ଅପେକ୍ଷା କୁକୁର ବିଶ୍ବାସୀ, ଏହା କେବଳ ବହିର କଥା ନୁହେଁ ବରଂ ତାହା ପ୍ରମାଣିତ ହୋଇଛି ଖୋର୍ଦ୍ଧା ଜିଲାର ମୁଣ୍ଡମୁହାଣ ଗ୍ରାମରେ। ପୋଷା କୁକୁର ଲାଡେନ୍‌ ଦୁଇ କୋମଳମତି ଶିଶୁଙ୍କ ଜୀବନ ରକ୍ଷା କରିବାକୁ ଯାଇ ନିଜ ଜୀବନକୁ ଜଳାଞ୍ଜଳି ଦେଇଛି। ଜୀବନ ଦେଇ ମାଲିକର ଋଣ ପରିଶୋଧ କରିଛି କୁକୁର। ନାଗସାପ ସହ ଲଢ଼ିବା ଓ ନାଗକୁ ମାରି ନିଜେ ମରିବା ଭଳି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।

ମୁଣ୍ଡମୁହାଣ ଗାଁର ସୁନିଲକୃଷ୍ଣ ସାମନ୍ତରାୟଙ୍କ ନାତି ସୋମ୍‍(୩) ଓ ନାତୁଣୀ ପ୍ରାଚୀ(୬) ପୋର୍ଟିକୋ ତଳେ ଲାଡେନ୍‍ ପାଖରେ ଖେଳୁଥିବା ବେଳେ ହଠାତ୍‍ ଏକ ବଡ଼ ନାଗ ଅଗଣା ଭିତରକୁ ପଶି ଆସିଥିଲା ଓ ଦୁଇ ଶିଶୁଙ୍କ ଆଡ଼କୁ ମାଡ଼ି ଯାଇଥିଲା। କିନ୍ତୁ ଚେନରେ ବନ୍ଧା ହୋଇଥିବା ସତ୍ତ୍ବେ ଲାଡେନ୍‍ ସାପ ଉପରକୁ ଲମ୍ଫ ଦେଇଥିଲା ଓ କାମୁଡ଼ି ପକାଇ ବାହାରକୁ ଛାଟି ଦେଇଥିଲା। ଆହତ ସାପଟି ପୁଣି କୁକୁର ଆଡ଼କୁ ମାଡ଼ି ଆସିଥିଲା। ଫଳରେ କୁକୁର ଓ ସାପ ମଧ୍ୟରେ କାମୁଡ଼ା କାମୁଡ଼ି ଲାଗିଥିଲା। ଶେଷରେ ଲାଡେନ୍‍ର ଆକ୍ରମଣରେ ସାପଟି ମରିଯାଇଥିଲା। ପରିବାର ଲୋକେ ଲାଡେନର କିଛି କ୍ଷତି ହୋଇଥିବ ଭାବି ତାକୁ ହସ୍ପିଟାଲ ନେବେ ବୋଲି ପ୍ରସ୍ତୁତ ହୋଇଥିଲେ। ମାତ୍ର ହସ୍ପିଟାଲ ଯିବା ପୂର୍ବରୁ ଲାଡେନ୍‍ ସଂଜ୍ଞା ହରାଇଥିଲା ଓ ମାତ୍ର କେଇ ମିନିଟ୍‍ ମଧ୍ୟରେ ଆଖି ବୁଜିଦେଇଥିଲା।