ହକି ବିଶ୍ୱକପ୍କୁ ଏକ ଉତ୍ସବର ରୂପ ଦେବା ଉଦ୍ଦେଶ୍ୟରେ ଚଳିତବର୍ଷ ରାଜଧାନୀ ଭୁବନେଶ୍ବରରେ ଆରମ୍ଭ ହୋଇଥିଲା ‘ଡଟ୍ ଫେଷ୍ଟ’ (ଭୁବନେଶ୍ୱର ସିଟି ଫେଷ୍ଟ)। ହକି ବିଶ୍ୱକପ୍ ସହ ସମାନ୍ତରାଳ ଭାବେ ରାଜଧାନୀରେ ଆୟୋଜିତ ହୋଇଥିଲା ଏଭଳି ଅନେକ ଷ୍ଟ୍ରିଟ୍ କାର୍ଣ୍ଣିଭାଲ। ‘ଡଟ୍ ଫେଷ୍ଟ’ରେ ବଲିଉଡ୍ର ନାମୀ କଳାକାର ନିଜର ସଙ୍ଗୀତ ଯାଦୁରେ ଦର୍ଶକଙ୍କୁ କରିଥିଲେ ମତୁଆଲା। ରାଜଧାନୀର ପ୍ରଦର୍ଶନୀ ପଡ଼ିଆଠାରେ ଏହି ଅବସରରେ କାର୍ଯ୍ୟକ୍ରମ ପରିବେଷଣ ଲାଗି ଏକାଠି ହୋଇଥିଲେ ଶାନ୍, ଶ୍ରୀୟା ଘୋଷାଲ, ଶଙ୍କର-ଏହସାନ୍-ଲୟ, ବିଶାଲ ଓ ଶେଖର, ଫରହନ୍ ଅଖତାର, ସିଦ୍ଧାନ୍ତ ଶର୍ମା ଏବଂ ସୋନା ମହାପାତ୍ରଙ୍କ ଭଳି ବଲିଉଡ୍ର ଷ୍ଟାର ସିଙ୍ଗର। ‘ବୁକ ମାଇଁ ଶୋ’ଜରିଆରେ ‘ଡଟ୍ ଫେଷ୍ଟ’ ପାଇଁ ଗ୍ରାହକ ଟିକଟ କିଣିଥିଲେ। ଏହି ଡଟ୍ ଫେଷ୍ଟରେ ବଲିଉଡ୍ର ଆଗଧାଡ଼ିର ସୁନ୍ଦରୀ ଗାୟିକା ଶ୍ରୀୟା ଘୋଷାଲ, ଶାନ୍, ବଲିଉଡ୍ର ହେଭିୱେଟ୍ ସଙ୍ଗୀତ ନିର୍ଦେଶକ, ଗାୟକ ତଥା ଲେଖକ ଫରହାନ୍ ଅଖତାର, ବିଶାଲ ଓ ଶେଖର, ସୋନା ମହାପାତ୍ର ଏବଂ ବଲିଉଡ୍ର ଅମର ଆକବର ଆନ୍ଥୋନୀ କୁହାଯାଉଥିବା ଗାୟକ ତଥା ସଙ୍ଗୀତ ନିର୍ଦେଶକ ଶଙ୍କର-ଏହସନ୍-ଲୟଙ୍କ କାର୍ଯ୍ୟକ୍ରମ ଥିଲା ସବୁଠାରୁ ଆକର୍ଷଣୀୟ। େସହିଭଳି ଏହି ସମୟରେ ପ୍ରଦର୍ଶନୀ ପଡ଼ିଆଠାରେ ଚାଲିଥିଲା ଫୁଡ୍ ଫେଷ୍ଟିଭାଲ। ଏଥିରେ ଦର୍ଶକ ଦୀର୍ଘ ୧୬ ଦିନ କାଳ ବିଭିନ୍ନ ଦେଶୀ ତଥା ବିଦେଶୀ ଖାଦ୍ୟ ସାମଗ୍ରୀର ମଜା ଉଠାଇଥିଲେ।
