ମୁମ୍ବଇ : ପ୍ରଦୀପ ସରକାର ନିର୍ଦେଶିତ ଓ ଅଜୟ ଦେବଗନ୍ ପ୍ରଯୋଜିତ ‘ହେଲିକପ୍ଟର ଇଲା’ ସେପ୍ଟେମ୍ବର ୭ରେ ସର୍ବଭାରତୀୟ ସ୍ତରରେ ମୁକ୍ତିଲାଭ କରିବାକୁ ଯାଉଛି। ଚଳଚ୍ଚିତ୍ରର ମୁଖ୍ୟ ଭୂମିକାରେ ଅଜୟଙ୍କ ପତ୍ନୀ କାଜଲ ଓ ଟୋଟା ରୟ ଚୌଧୁରୀ ଅଭିନୟ କରୁଛନ୍ତି। ମା-ପୁଅଙ୍କ ସମ୍ପର୍କକୁ ନେଇ ଏଇ ଚଳଚ୍ଚିତ୍ରର କାହାଣୀ ଗଢ଼ି ଉଠିଛି। ପ୍ରଚାର ଅବସରରେ କାଜଲ କହିଛନ୍ତି, କାହାଣୀ ଯେତେବେଳେ ସେ ଓ ଅଜୟ ଶୁଣିଲେ, ଅଜୟଙ୍କ ପ୍ରଥମ ନିଷ୍ପତ୍ତି ଥିଲା ଚଳଚ୍ଚିତ୍ରର ପ୍ରଯୋଜନା ସେ ହିଁ କରିବେ। ଚଳଚ୍ଚିତ୍ରର ଚରିତ୍ର ସହ ଅନେକାଂଶରେ ସେ ଦୁହେଁ ଜଡ଼ିତ। ଅଜୟ ଓ କାଜଲଙ୍କର ଦୁଇ ପିଲା ନାଇସା ଦେବଗନ୍ ଓ ୟୁଗ୍ ଦେବଗନ୍। ବଡ଼ ଝିଅ ନାଇସା ଏବେ ସିଙ୍ଗାପୁରର ଏକ ନାମୀ କଲେଜରେ ପାଠ ପଢ଼ୁଛି। ବାପା-ମା’ ଦୁଇ ପିଲାଙ୍କ ନିମନ୍ତେ ଆବଶ୍ୟକତାଠାରୁ ଅଧିକ ଯତ୍ନଶୀଳ, ତେବେ ଝିଅ ନାଇସା ପାଇଁ ଦୁହେଁ ସବୁବେଳେ ଚିନ୍ତିତ ରୁହନ୍ତି। ନାଇସା ଜଣେ ମେଧାବୀ ଛାତ୍ରୀ। ସପ୍ତମ-ଅଷ୍ଟମ ଶ୍ରେଣୀରେ ପଢ଼ିବା ସମୟରେ ବିଭିନ୍ନ ପ୍ରୋଜେକ୍ଟ ନିମନ୍ତେ ନାଇସାଙ୍କୁ ମୁମ୍ବଇ ବାହାରକୁ ଯିବା ନିମନ୍ତେ ସୁଯୋଗ ଆସୁଥିଲା। ଅଜୟ ଝିଅକୁ କେଉଁଆଡ଼େ ଛାଡ଼ନ୍ତି ନାହିଁ। କାରଣ ନାଇସାଙ୍କୁ ଛାଡ଼ି ସେ ଗୋଟିଏ ମୁହୂର୍ତ୍ତ ରହିପାରିବେନାହିଁ ବୋଲି ଯୁକ୍ତି ଥିଲା। ଝିଅ ବଡ଼ ହେବା ପରେ ଥରେ ବାପାଙ୍କୁ ପଚାରିଲା, ତୁମେ ତ’ ନିଜ କାମ ପାଇଁ ମାସମାସ ବାହାରେ ରହୁଛ, ତେବେ ଏବେଠାରୁ ମୁଁ କାହିଁକି ଆତ୍ମନିର୍ଭରଶୀଳ ନ ହେବି? ଅଜୟଙ୍କୁ ଏହି କଥାଟି ଖୁବ୍ ଆଘାତ ଦେଇଥିଲା, ହେଲେ ଅଜୟଙ୍କ ମା’ ତାଙ୍କୁ ବୁଝାଇଥିଲେ। ପିଲା ସ୍ବାଧୀନତା ଚାହୁଁଛି, ତାକୁ ଧୀରେଧୀରେ ଦିଆଯାଉ। ନଚେତ୍ ଆଗାମୀ ଦିନରେ ବାପା-ମା’ଙ୍କୁ ନିଜର ଶତ୍ରୁ ବୋଲି ମନେ କରିବ। ‘ହେଲିକପ୍ଟର-ଇଲା’ କାହାଣୀ ଏହିଭଳି ଚରିତ୍ରଙ୍କୁ ନେଇ ଆରମ୍ଭ ହୋଇଥିବାବେଳେ ଅଭିଭାବକଙ୍କୁ ଏକ ସୁନ୍ଦର ବାର୍ତ୍ତା ମଧ୍ୟ ଦେଇଛି।
