ବିହାରରେ ଜାପାନିଜ ଏନସେଫାଲାଇଟିସ ଆତଙ୍କ, ୩୧ ଶିଶୁ ମୃତ

0
73
Image courtesy: Aajtak

ପାଟନା: ବିହାରର ମୁଜଫପୁରରେ ଜାପାନିଜ ଏନସେଫାଲାଇଟିସ ଆତଙ୍କ ସୃଷ୍ଟି କରିଛି। ବିଗତ ୧୦ ଦିନ ମଧ୍ୟରେ ଏହି ଜ୍ଵରରେ ୩୧ ଶିଶୁଙ୍କ ମୃତ୍ୟୁ ଘଟିଛି। ମେଡିକାଲ କଲେଜ ଅଧୀକ୍ଷକ ସୁନୀଲ ଶାହିଙ୍କ ସୂଚନା ଅନୁସାରେ, ଗତ ୨ ତାରିଖରୁ ବର୍ତ୍ତମାନ ସମୟ ମଧ୍ୟରେ ୮୬ ଶିଶୁ ଏହି ରୋଗରେ ଆକ୍ରାନ୍ତ ହୋଇଥିବା ଚିହ୍ନଟ ହୋଇଛି। ସେମାନଙ୍କ ମଧ୍ୟରୁ ୩୧ ଜଣଙ୍କ ମୃତ୍ୟୁ ହୋଇସାରିଛି। ଦିଲ୍ଲୀ ଏବଂ ବମ୍ବେରୁ ୨ଟି ଟିମ୍‌ ମୁଜଫପୁର ଆସି ପରିସ୍ଥିତି ଅନୁଧ୍ୟାନ କରିଛନ୍ତି। ଏହା ପୂର୍ବରୁ ଗତ ଜାନୁୟାରୀରୁ ଜୁନ ୨ ମଧ୍ୟରେ ୧୩ ରୋଗୀ ଚିହ୍ନଟ ହୋଇଥିଲେ, ଯେଉଁମାନଙ୍କ ମଧ୍ୟରୁ ୩ ଜଣ ପ୍ରାଣ ହରାଇଥିଲେ।

୧୫ ବର୍ଷ ବୟସ ମଧ୍ୟରେ ରହିଥିବା ଶିଶୁମାନେ ବିଶେଷ କରି ଏହି ରୋଗରେ ଆକ୍ରାନ୍ତ ହେଉଛନ୍ତି। ୧ରୁ ୭ବର୍ଷ ବୟସର ଆକ୍ରାନ୍ତ ଶିଶୁମାନେ ଏଥିରେ ପ୍ରାଣ ହରାଉଛନ୍ତି। ଅଧିକାଂଶ ଗରିବ ପରିବାରର ପିଲା ଏଥିରେ ଆକ୍ରାନ୍ତ ହେଉଥିବା ଦେଖିବାକୁ ମିଳୁଛି। ପ୍ରବଳ ଜ୍ଵର ହେବା, ଶିଶୁଙ୍କ ଶରୀରରେ କମ୍ପନ ସୃଷ୍ଟି ହେବା, ଚେତା ହରାଇବା ଆଦି ଏହି ରୋଗର ଲକ୍ଷଣ ବୋଲି ଡାକ୍ତରମାନେ କହିଛନ୍ତି। ତେବେ ଏଥର ବିହାରରେ ଅଧିକ ଗରମ ହେଉଥିବାରୁ ଏହି ରୋଗ ମାତ୍ରାଧିକ ବ୍ୟାପିବାରେ ଲାଗିଛି। ଗତବର୍ଷ କମ୍‌ ଗରମ ହୋଇଥିଲାବେଳେ ଏହାର ପ୍ରଭାବ ମଧ୍ୟ କମ୍‌ ଦେଖିବାକୁ ମିଳିଥିଲା।