୧୨ଡିସେମ୍ବରରେ ଅମ୍ବାନୀ ପରିବାରର ମହାବିବାହ : ପ୍ରାକ୍ ବିବାହ ସମାରୋହରେ ଦେଶୀ-ବିଦେଶୀ ତାରକାଙ୍କ ଭିଡ଼
ମୁମ୍ବଇ : ଚଳିତ ଦିନରେ ବଲିଉଡ଼ରେ ବିବାହର ଋତୁ ଚାଲିଛି। ଇତିମଧ୍ୟରେ ଦେଶର ସବୁଠାରୁ ଧନୀ ବ୍ୟବସାୟୀ ମୁକେଶ ଅମ୍ବାନୀଙ୍କ ଝିଅ ଈଶା ଅମ୍ବାନୀ ମଧ୍ୟ ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି।୧୨ଡିସେମ୍ବରରେ ଆନନ୍ଦ ପୀରାମଲଙ୍କୁ ବିବାହ କରିବେ ଈଶା।
ତେବେ ଈଶାଙ୍କ ପ୍ରାକ୍ ବିବାହ ସମାରୋହ ଆରମ୍ଭ ହୋଇଯାଇଛି। ଶନିବାର ତାଙ୍କର ସଙ୍ଗୀତ ସମାରୋହ ଅନୁଷ୍ଠିତ ହୋଇଯାଇଛି। ଏଥିରେ ବଲିଉଡ଼ ଜଗତର ପ୍ରସିଦ୍ଧ ତାରକାମାନଙ୍କ ସମେତ ବହୁ ବିଦେଶୀ ତାରକା ମଧ୍ୟ ଯୋଗ ଦେଇଥିଲେ। ଏହି ସଙ୍ଗୀତ ସମାରୋହରେ ଅମ୍ବାନୀ ପରିବାର ନୃତ୍ୟ କରିଥିଲେ। ବିବାହର ସମସ୍ତ ସମାରୋହ ପାଇଁ ଉଦୟପୁରର ଉଦୟ ବିଳାସ ବୁକ୍ କରାଯାଇଛି।
ସୂଚନା ଅନୁସାରେ, ବିବାହକୁ ଗୋପନ ରଖିବା ପ୍ରତି ଧ୍ୟାନ ଦେବା ପାଇଁ ଉଭୟ ଅମ୍ବାନୀ ଓ ପୀରାମଲ ପରିବାର ନିଜ ଅତିଥିମାନଙ୍କୁ ନିବେଦନ କରିଛନ୍ତି। ଏନେଇ ଅତିଥିମାନଙ୍କୁ ଫୋନର ବ୍ୟବହାର କରିବା ଓ ଫଟୋ ଉଠାଇବାକୁ ମନା କରାଯାଇଛି। କୌଣସି ଫଟୋ, ଭିଡିଓ ଓ ଅଡ଼ିଓକୁ ସାମାଜିକ ଗଣମାଧ୍ୟମରେ ଶେୟାର ନକରିବା ପାଇଁ ପରିବାର ତରଫରୁ କଡ଼ାକଡ଼ି ଭାବେ ସୂଚନା ଦିଆଯାଇଛି। ତେବେ ପୂର୍ବରୁ ଦୀପିକା ପାଦୁକୋନ ଓ ପ୍ରିୟଙ୍କା ଚୋପ୍ରାଙ୍କ ବିବାହରେ ମଧ୍ୟ ଏପରି ନିୟମ ଲାଗୁ କରାଯାଇଥିଲା।