ମହୌଷଧୀ କେଶର; କେବଳ ସୌନ୍ଦର୍ଯ୍ୟ ନୁହେଁ ବିଭିନ୍ନ ରୋଗ ଦୂର କରେ କେଶର !
ବଜାରରେ ମିଳୁଥିବା ଦାମୀ ସାମଗ୍ରୀ ମଧ୍ୟରୁ କେଶର ହେଉଛି ଗୋଟିଏ । ଔଷଧୀୟ ଗୁଣରେ ଭରପୁର କେଶରର ବ୍ୟବହାର କେବଳ ଯେ ସୌନ୍ଦର୍ଯ୍ୟ ବୃଦ୍ଧି ପାଇଁ କରାଯାଏ ତାହା ନୁହେଁ । କେଶର ଖାଦ୍ୟର ସ୍ବାଦ ଦ୍ବିଗୁଣ କରିବା ସହ ବିଭିନ୍ନ ରୋଗରୁ ମଧ୍ୟ ଉପଶମ ଦେଇଥାଏ । କେଶର ସେବନ ଦ୍ବାରା ଶରୀରକୁ ଅନେକ ଲାଭ ମିଳିଥାଏ । ଆସନ୍ତୁ ଜାଣିବା କେଶରର ଔଷଧୀୟ ଗୁଣ ବିଷୟରେ…
କର୍କଟ ରୋଗରୁ ସୁରକ୍ଷିତ ରଖେ: ଏଥିରେ ଭରପୁର ମାତ୍ରାରେ ଆଣ୍ଟିଅକ୍ସିଡେଣ୍ଟ ରହିଥାଏ । ଶରୀରରେ ଥିବା କ୍ଷତିକାରକ ମୁକ୍ତ-କଣିକାକୁ ଅକାମୀ କରି କେଶର ଶରୀରକୁ ସୁରକ୍ଷିତ ରଖିବାରେ ସାହାଯ୍ୟ କରିଥାଏ । ଗବେଷଣାରୁ ଏହା ପ୍ରମାଣ ହୋଇଛି ଯେ କେଶରରେ ଥିବା ଔଷଧୀୟ ଗୁଣ କର୍କଟ ରୋଗ ସୃଷ୍ଟିକାରୀ କୋଷିକା ନଷ୍ଟ କରି ଦେଇଥାଏ ।
ଓଜନ ହ୍ରାସ କରିବାରେ ସାହାଯ୍ୟ: ଏକ ଗବେଷଣାରୁ ଜଣାପଡିଛି ଯେ କେଶର ସେବନ ଦ୍ବାରା ଭୋକ କମ୍ ହୋଇଥାଏ । ଯାହା ଦ୍ବାରା ସେମାନେ ଚଟପଟା ଖାଦ୍ୟ (ସ୍ନାକ୍ସ) କମ୍ ଖାଇଥାଆନ୍ତି । ଫଳରେ ଓଜନ ନିୟନ୍ତ୍ରିତ ରହିଥାଏ ।
ସ୍ମରଣଶକ୍ତି ବୃଦ୍ଧି: କେଶର ଖାଇବା ଦ୍ବାରା ସ୍ମରଣ ଶକ୍ତି ବୃଦ୍ଧି ହୋଇଥାଏ । ଜାପାନରେ ଲୋକମାନେ ସ୍ମରଣ ଶକ୍ତି ବୃଦ୍ଧି ଏବଂ ଶରୀରର ମାଂସପେଶୀ ଫୁଲା କମ୍ କରିବା ପାଇଁ କେଶରର କ୍ୟାପସୁଲ ଖାଇଥାଆନ୍ତି ।
ସର୍ଦିରୁ ମୁକ୍ତି: ସର୍ଦି ଓ କାଶ ଦୂର କରିବା ପାଇଁ କେଶର ସାହାଯ୍ୟ କରିଥାଏ । ଅଳ୍ପ କ୍ଷୀରରେ କେଶରକୁ ମିଶାଇ ମୁଣ୍ଡରେ ଲଗାଇବା ଦ୍ବାରା ସର୍ଦିରୁ ଶୀଘ୍ର ଉପଶମ ମିଳିଥାଏ ।
ହୃଦଘାତ ରୋଗରୁ ମୁକ୍ତି: ଗବେଷଣାରୁ ଜଣାପଡିଛି ଯେ, କେଶରରେ ଥିବା ଆଣ୍ଟିଅକ୍ସିଡେଣ୍ଟ ଗୁଣ ରକ୍ତରେ କୋଲେଷ୍ଟ୍ରୋଲ ର ମାତ୍ର କମ୍ କରିଥାଏ । ଯାହା ଫଳରେ ରକ୍ତ ସଞ୍ଚାଳନରେ କୌଣସି ବାଧା ସୃଷ୍ଟି ହୋଇ ନଥାଏ ।
ଆଖିର ଜ୍ୟୋତି ବୃଦ୍ଧି: କେଶର ଆଖି ସମସ୍ୟା ଦୂର କରିବାରେ ସାହାଯ୍ୟ କରିଥାଏ । ଏକ ଗବେଷଣାରୁ ପ୍ରମାଣ ହୋଇଛି ଯେ କେଶସ ସେବନ ଦ୍ବାରା ଆଖିର ଜ୍ୟୋତି ବୃଦ୍ଧି ହୋଇଥାଏ ।