ବିଧିବଦ୍ଧ ବିଜେପିରେ ମିଶିଲେ ଗୋଆର ୧୦ ବିଧାୟକ

ନୂଆଦିଲ୍ଲୀ : କଂଗ୍ରେସରୁ ଇସ୍ତଫା ଦେଇଥିବା ଗୋଆର ୧୦ ବିଧାୟକ ଗୁରୁବାର ବିଧିବଦ୍ଧ ଭାବେ ବିଜେପିରେ ଯୋଗଦେଇଛନ୍ତି। ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତଙ୍କ ସହିତ ଏହି ୧୦ ବିଧାୟକ ଦିଲ୍ଲୀରେ ପହଞ୍ଚି ବିଜେପି କାର୍ଯ୍ୟକାରୀ ସଭାପତି ଜେ.ପି ନଡ୍ଡାଙ୍କ ଉପସ୍ଥିତିରେ ଦଳରେ ସାମିଲ ହୋଇଛନ୍ତି। ସେମାନଙ୍କ ମିଶ୍ରଣ ସଂକ୍ରାନ୍ତ ପତ୍ର ଗୋଆ ବାଚସ୍ପତି ରାଜେଶ ପଟନେକରଙ୍କୁ ପ୍ରଦାନ କରାଯାଇଛି। କଂଗ୍ରେସ ଛାଡ଼ିଥିବା ବିିଧାୟକଙ୍କ ମଧ୍ୟରେ ବିଧାନସଭାରେ ବିରୋଧୀ ଦଳ ନେତା ଥିବା ଚନ୍ଦ୍ରକାନ୍ତ କାଭଲେକର ଅଛନ୍ତି। ଏହା ଦ୍ବାରା ୪୦ସଦସ୍ୟ ବିଶିଷ୍ଟ ବିଧାନସଭାରେ ବିଜେପି ବିଧାୟକଙ୍କ ସଂଖ୍ୟା ୨୭ରେ ପହଞ୍ଚିଛି। ୨୦୧୭ ବିଧାନସଭା ନିର୍ବାଚନରେ କଂଗ୍ରେସ ସର୍ବାଧିକ ୧୭ ଆସନରେ ବିଜୟଲାଭ କରିଥିଲେ ମଧ୍ୟ ସରକାର ଗଠନରେ ସଫଳ ହୋଇପାରି ନ ଥିଲା। ଏବେ ଏହାର ସଦସ୍ୟ ସଂଖ୍ୟା ୫କୁ ଖସିଆସିଛି। ମାତ୍ର ୧୩ ଆସନ ପାଇ ବିଜେପି ଆଞ୍ଚଳିକ ଦଳଙ୍କ ସହଯୋଗରେ ସରକାର ଗଠନ କରିଥିଲା।
ଏହି ଘଟଣାରେ ପ୍ରତିକ୍ରିୟା ପ୍ରକାଶ ପୂର୍ବକ ଦିବଂଗତ ମୁଖ୍ୟମନ୍ତ୍ରୀ ମନୋହର ପରିକରଙ୍କ ପୁଅ ଉତ୍ପଳ ପରିକର କହିଛନ୍ତି ଯେ ‘ଏହା ଦ୍ବାରା ତାଙ୍କ ବାପାଙ୍କ ରାଜନୈତିକ ଆଦର୍ଶର ଅନ୍ତ ଘଟିଛି। ଦେଶସାରା କଂଗ୍ରେସର ଅବକ୍ଷୟ ଘଟୁଛି। ବିଜେପି ପ୍ରତି ଏଥିରେ ମିଶୁଥିବା କଂଗ୍ରେସ ନେତାଙ୍କର ଆନୁଗତ୍ୟ ନେଇ ସନ୍ଦେହ ରହିଛି। ଏଭଳି ରାସ୍ତା ଦଳକୁ କେତେବାଟ ନେବ ତାହା ସମୟ କହିବ। ମାର୍ଚ୍ଚ ୧୭ରେ ବାପାଙ୍କ ମୃତ୍ୟୁ ସହିତ ଗୋଟିଏ ଆଦର୍ଶ ଭିତ୍ତିକ ରାସ୍ତାର ଅନ୍ତ ଘଟିଥିଲା। ଏବେକାର ନୂଆ ରାସ୍ତା ଆମକୁ କେତେଦୂର ଆଗକୁ ନେଉଛି ତାହାକୁ ଅପେକ୍ଷା। ବିଜେପି ଏଥିପ୍ରତି ସଚେତନ ରହିବା ଆବଶ୍ୟକ।’ ଉତ୍ପଳ ଚେତାଇ ଦେଇଛନ୍ତି ଯେ ଦଶନ୍ଧି ଧରି କାର୍ଯ୍ୟ କରୁଥିବା ବିଜେପି କ୍ୟାଡର ପ୍ରତି ଦଳର ନେତାମାନେ ସଚେତନ ରହିବା ଆବଶ୍ୟକ।