ବସ୍‍ ଭିତରେ ଯୁବତୀଙ୍କୁ ଅସଦାଚରଣ ଉଦ୍ୟମ, ଯୁବକଙ୍କୁ ନିର୍ଧୁମ ଛେଚି ପୁଲିସ୍‍ ଜିମା ଦେଲେ

ଦେବଗଡ଼ : ବସ ଭିତରେ ଜଣେ ଯୁବତୀଙ୍କୁ ଅସଦାଚରଣ କରିବା ଘଟଣା ସୁନ୍ଦରଗଡ ଜିଲା ବଡଗାଁ ଅଞ୍ଚଳର ଜଣେ ଯୁବକଙ୍କ ପାଇଁ ମହଙ୍ଗା ପଡିଛି। ଏପରିକି ଉକ୍ତ ଯୁବତୀଙ୍କ ଭାଇ ତାକୁ ବସ ମଧ୍ୟରେ ନିର୍ଧୁମ ଛେଚିବା ସହ କେବଳ ଅନଃବସ୍ତ୍ର ପିନ୍ଧିଥିବା ଅବସ୍ଥାରେ ସର୍ବସାଧାରଣ ରାସ୍ତାରେ ଚଲାଇଚଲାଇ ନେଇ ପୁଲିସ୍‍ ଜିମା ଦେଇଥିଲେ।

ମିଳିଥିବା ସୂଚନା ଅନୁଯାୟୀ ଦେବଗଡ ସହରରେ ରହୁଥିବା ଜଣେ ଅଣଓଡିଆ ଟାଇଲ ମିସ୍ତ୍ରୀ ଗତକାଲି ରାତ୍ରିରେ ତାଙ୍କ ବାପା ଓ ଭଉଣୀଙ୍କ ସହ ନାଇଟ କୋଚ ‘ଶ୍ରୀୟା’ଯୋଗେ ଭୁବନେଶ୍ୱରରୁ ଦେବଗଡ ଆସୁଥିଲେ। ବସ୍‍ଟି ଅନୁଗୁଳ ଜିଲାର ଖମାର ପାଖାପାଖି ପହଞ୍ଚିଥିବା ସମୟରେ ଉକ୍ତ ବସରେ କୁଚିଣ୍ଡା ଅଭିମୁଖେ ଯାଉଥିବା ସୁନ୍ଦରଗଡ ଜିଲାର ଜଣେ ଯୁବକ, ଯୁବତୀ(ଟାଇଲ ମିସ୍ତ୍ରୀଙ୍କ ଭଉଣୀ)ଙ୍କୁ ଅସଦାଚରଣ ପାଇଁ ଉଦ୍ୟମ କରିଥିଲା। ଏକଥା ଜଣାପଡିବା ପରେ ଟାଇଲ ମିସ୍ତ୍ରୀ ଏନେଇ ବସର କଣ୍ଡକ୍ଟରଙ୍କୁ ଜଣାଇବାସହ ଅଭିଯୁକ୍ତ ଯୁବକକୁ ନିସ୍ତୁକ ମାଡ ମାରିଥିଲେ। ବସଟି ଦେବଗଡ ପହଞ୍ଚିବାପରେ ଟାଇଲ ମିସ୍ତ୍ରୀ ଜଣକ ଉକ୍ତ ଯୁବକକୁ ସର୍ବ ସମ୍ମୁଖରେ କେବଳ ଚପଲ ଓ ଅନ୍ତର୍ବସ୍ତ୍ର ପିନ୍ଧିଥିବା ଅବସ୍ଥାରେ ଚଲାଇଚଳାଇ ଦେବଗଡ ଥାନାକୁ ନେଇଥିଲେ।