ପୁଣେ : କ୍ରିକେଟ୍ରେ ଦଳର ପ୍ରଶିକ୍ଷକଙ୍କ ଠାରୁ ଅଧିନାୟକଙ୍କ ଭୂମିକା ଅଧିକ ଗୁରୁତ୍ୱପୂର୍ଣ୍ଣ ବୋଲି ମତ ଦେଇଛନ୍ତି ପୂର୍ବତନ ଅଧିନାୟକ ସୌରଭ ଗାଙ୍ଗୁଲି। ଏଠାରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେବା ଅବସରରେ ଗାଙ୍ଗୁଲି କହିଥିଲେ ମ୍ୟାଚ୍ ଖେଳାଯାଉଥିବା ସମୟରେ ପ୍ରଶିକ୍ଷକଙ୍କ ଠାରୁ ଅଧିନାୟକଙ୍କ ଭୂମିକା ଅଧିକ ମହତ୍ତ୍ୱ ବହନ କରୁଛି। ମ୍ୟାଚ୍ରେ କେଉଁ ରଣନୀତି ଆପଣାଇବାକୁ ହେବ ତାହା ଅଧିନାୟକଙ୍କ ଉପରେ ନିର୍ଭର କରିଥାଏ। ଅଧିନାୟକଙ୍କ କାମରେ ପ୍ରଶିକ୍ଷକ ହସ୍ତକ୍ଷେପ କରିବା ଅନୁଚିତ୍।
ଗାଙ୍ଗୁଲି ଆହୁରି କହିଛନ୍ତି କେତେକ ପ୍ରଶିକ୍ଷକ ଫୁଟବଲ ଦଳ ଭଳି କ୍ରିକେଟ୍ ଦଳକୁ ପରିଚାଳିତ କରିବାକୁ ଚାହୁଁଛନ୍ତି। ତେବେ ଫୁଟବଲ ଓ କ୍ରିକେଟ୍ ସମାନ ନୁହେଁ ବୋଲି ସେମାନଙ୍କୁ ମନେ ରଖିବାକୁ ପଡ଼ିବ। କ୍ରିକେଟ୍ ମ୍ୟାଚ୍ ଚାଲିଥିବା ସମୟରେ ନିଷ୍ପତ୍ତି ନେବା ଅଧିକାର କେବଳ ଅଧିନାୟକଙ୍କ ରହିଛି। ପ୍ରଶିକ୍ଷକ ଏଥିରେ ମୁଣ୍ଡ ଖେଳାଇବା ଅନାବଶ୍ୟକ। ଜଣେ ପ୍ରଶିକ୍ଷକଙ୍କର କ’ଣ ସବୁ ଗୁଣ ରହିବା ଉଚିତ୍ ବୋଲି ଏକ ପ୍ରଶ୍ନର ଉତ୍ତରରେ ଗାଙ୍ଗୁଲି କହିଥିଲେ ଖେଳାଳିଙ୍କ ଠାରୁ ସର୍ବଶ୍ରେଷ୍ଠ ପ୍ରଦର୍ଶନ ଆଦାୟ କରିପାରୁଥିବା ବ୍ୟକ୍ତି ହିଁ ଶ୍ରେଷ୍ଠ ପ୍ରଶିକ୍ଷକ। ତେବେ ବିଶ୍ୱସ୍ତରରେ ଏପରି ବହୁତ କମ୍ ପ୍ରଶିକ୍ଷକ ଥିବା ସେ ମତ ଦେଇଛନ୍ତି। ସଚିନ ତେନ୍ଦୁଲକର, ରାହୁଲ ଦ୍ରାବିଡ଼, ବୀରେନ୍ଦ୍ର ସେହ୍ୱାଗ, ଜାହିର ଖାନ୍ ଓ ହରଭଜନ ସିଂହଙ୍କ ପରି ତାରକା ଖେଳାଳିଙ୍କ ସହ ଖେଳିଥିବାରୁ ସେ ନିଜକୁ ଭାଗ୍ୟବାନ୍ ମନେ କରୁଥିବା ଗାଙ୍ଗୁଲି କହିଛନ୍ତି।
