ଦାନରେ ଗର୍ଭାଶୟ: ଜନ୍ମନେଲା ଶିଶୁ

0
211

ନୂଆଦିଲ୍ଲୀ: ବ୍ରାଜିଲର ଡାକ୍ତରଙ୍କୁ ଶିଶୁ ଜନ୍ମ କ୍ଷେତ୍ରରେ ବଡ଼ ଧରଣର ସଫଳତା ମିଳିଛି। ମେଡିକାଲ ଇତିହାସରେ ପ୍ରଥମ ଥର ପାଇଁ ଜଣେ ମୃତ ମହିଳାଙ୍କ ଗର୍ଭାଶୟରୁ ଏକ ଶିଶୁର ଜନ୍ମ ହୋଇପାରିଛି। ପୂର୍ବରୁ ବହୁଥର ମୃତ ମହିଳାଙ୍କ ଗର୍ଭାଶୟ ଟ୍ରାନ୍ସପ୍ଲାଣ୍ଟ କରିବାକୁ ଉଦ୍ୟମ କରାଯାଇ ଥିଲା,ତେବେ ତାହା ବିଫଳ ହୋଇଥିଲା।
ଏକ ଇଂରାଜୀ ୱେବସାଇଟର ତଥ୍ୟ ଅନୁଯାୟୀ, ସୋଓ ପାଉଲୋ ବିଶ୍ୱବିଦ୍ୟାଳୟର ଡାକ୍ତର ଡାନୀ ଇଜେନବର୍ଗଙ୍କ କହିବା ଅନୁସାରେ ଜଣେ ମୃତ ମହିଳାଙ୍କ ଗର୍ଭାଶୟର ଟ୍ରାନ୍ସପ୍ଲାଣ୍ଟ ସେପ୍ଟେମ୍ବର ୨୦୧୬ରେ କରାଯାଇ ଥିଲା। ଜଣେ ୩୨ ବର୍ଷିୟା ମହିଳାଙ୍କ ଶରୀରରେ ଏହି ଗର୍ଭାଶୟ ଲଗାଯାଇଥିଲା। ଏହି ମହିଳା ଜନ୍ମରୁ ଗର୍ଭାଶୟ ବିନା ଜନ୍ମ ହୋଇଥିଲେ। ମୃତ ମହିଳାଙ୍କ ବୟସ ୪୫ବର୍ଷ ହୋଇଥିବାବେଳେ ତାହା ସଫଳତାର ସହ ଅନ୍ୟ ମହିଳାଙ୍କ ଶରୀରରେ ଲାଗିଥିଲା। ହୃଦଘାତରେ ମୃତ ମହିଳାଙ୍କ ୩ଟି ସନ୍ତାନ ଥିଲେ।
ପୂର୍ବରୁ ଏଭଳି ୧୦ଟି ପ୍ରୟୋଗ ଆମେରିକା, ତୁର୍କୀ ପରି ଦେଶରେ କରା ଯାଇଥିଲା। ତେବେ ତାହା ବିଫଳ ହୋଇଥିଲା।
ଦାନର ଗର୍ଭାଶୟରୁ ଗତ ବର୍ଷ ଶିଶୁ ଜନ୍ମ ନେବା ପରେ ଶିଶୁ ଓ ମା’ର ସ୍ୱାସ୍ଥ୍ୟ ଠିକ ରହିଛି। ଡାକ୍ତରମାନେ ମହିଳା ଅନ୍ତଃସତ୍ତ୍ୱା ହେବା ପରଠାରୁ ବିଭିନ୍ନ ପରୀକ୍ଷା ଦ୍ୱାରା ମା’ ଓ ଶିଶୁର ସ୍ୱାସ୍ଥ୍ୟ ଉପରେ ନଜର ରଖିଥିଲେ।
ଜୀବିତ ମହିଳାଙ୍କ ଗର୍ଭାଶୟ ଟ୍ରାନ୍ସପ୍ଲାଣ୍ଟ ୨୦୧୪ ରେ ସ୍ୱିଡେନରେ ପ୍ରଥମ ଥର କରାଯାଇ ଥିଲା। ଏହାର ସଫଳତା ପରେ ଅନୁରୂପ ପଦ୍ଧତିରେ ପରବର୍ତ୍ତୀ ସମୟରେ ୧୦ଟି ମହିଳାଙ୍କୁ ଗର୍ଭାଶୟ ଦାନ କରାଯାଇ ସେମାନେ ସଫଳତାର ସହ ଶିଶୁକୁ ଜନ୍ମ ଦେଇଥିଲେ। ତେବେ ମୃତ ମହିଳାଙ୍କ ଗର୍ଭାଶୟରୁ ପ୍ରଥମ ଥର ପାଇଁ ଶିଶୁ ଜନ୍ମଗ୍ରହଣ କରିବା ବିଶ୍ୱ ମେଡିକାଲ ବିଜ୍ଞାନ ପାଇଁ ବଡ଼ ଉପଲବ୍ଧି ବୋଲି କୁହାଯାଇ ପାରେ।

LEAVE A REPLY

Please enter your comment!
Please enter your name here