ଫନି କ୍ଷୟକ୍ଷତିର ଚୁଡ଼ାନ୍ତ ରିପୋର୍ଟ : ୯୩୩୬ କୋଟି ଟଙ୍କାର କ୍ଷୟକ୍ଷତି ଆକଳନ

ଭୁବନେଶ୍ବର : ଭୟଙ୍କର ବତ୍ୟା ଫନିରେ ରାଜ୍ୟର କ୍ଷୟକ୍ଷତି ସଂପର୍କରେ ସରକାରଙ୍କ ପକ୍ଷରୁ ଚୁଡ଼ାନ୍ତ ରିପୋର୍ଟ ପ୍ରସ୍ତୁତ ହୋଇଛି । ସ୍ବତନ୍ତ୍ର ରିଲିଫ୍ କମିଶନର ବିଷ୍ଣୁପଦ ସେଠୀ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଗୁରୁବାର ଏହି ଚୁଡ଼ାନ୍ତ ରିପୋର୍ଟ ପ୍ରଦାନ କରିଛନ୍ତି।

ବାତ୍ୟା ଫନି ଯୋଗୁଁ ରାଜ୍ୟରେ ମୋଟ୍ ୯୩୩୬ କୋଟି ଟଙ୍କାର କ୍ଷୟକ୍ଷତି ଆକଳନ କରାଯାଇଛି । ତେବେ ସର୍ବସାଧାରଣଙ୍କର ୬୬୪୩.୬୩ କୋଟି ଟଙ୍କାର ସମ୍ପତ୍ତି କ୍ଷୟକ୍ଷତି ହୋଇଛି । ପ୍ରଭାବିତଙ୍କ ରିଲିଫ୍ ପାଇଁ ୨୬୯୨.୬୩ କୋଟି ଟଙ୍କାର ଆବଶ୍ୟକତା ରହିଛି।

ବାତ୍ୟାରେ ରାଜ୍ୟର ୧୪ଟି ଜିଲ୍ଲାର ୨୦,୩୬୭ଟି ଗାଁ ପ୍ରଭାବିତ ହୋଇଛି । ରାଜ୍ୟର ମୋଟ୍ ୧ କୋଟି ୬୦ ଲକ୍ଷ ଲୋକ ଫନି ଦ୍ବାରା ପ୍ରଭାବିତ ହୋଇଛନ୍ତି । ୧ ଲକ୍ଷ ୮୮ ହଜାର ହେକ୍ଟର ଜମିର ଫସଲ କ୍ଷତିଗ୍ରସ୍ତ ହୋଇଛି । ସେହିପରି ୫,୫୬,୭୬୧ ଘର ଆଂଶିକ ଓ ସଂମ୍ପୂର୍ଣ୍ଣ ଭାବେ କ୍ଷତିଗ୍ରସ୍ତ ହୋଇଛି ବୋଲି ରିପୋର୍ଟରେ ଦର୍ଶାଯାଇଛି । ବାତ୍ୟାରେ ୬୪ ଜଣ ଲୋକଙ୍କର ମୃତ୍ୟୁ ଘଟିଛି ଏବଂ ୧୨ ଜଣ ଗୁରୁତର ଆହତ ହୋଇଛନ୍ତି । ବିଭିନ୍ନ ଜିଲ୍ଲାକୁ ୧୩୫୭.୧୪ କୋଟି ଟଙ୍କାର ସହାୟତା ଦିଆଯାଇଛି ବୋଲି ରିପୋର୍ଟରେ ଦର୍ଶାଯାଇଛି ।