ପାରଳାଖେମୁଣ୍ଡି/ଗୁମ୍ମା: ଗଜପତି ଜିଲା ଗୁମ୍ମା ବ୍ଲକ ଅନ୍ତର୍ଗତ କେଶିପୁରରୁ ପୁଲିସ ଜାଲ ନୋଟ ଜବତ କରିବା ସହ, ଜାଲ ନୋଟ କାରବାର କରୁଥିବା ୩ ଜଣ ଅଭିଯୁକ୍ତଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନଙ୍କ ଠାରୁ ନକଲି ୫୦୦ ଟଙ୍କିଆ ନୋଟ ଜବତ କରାଯାଇଛି ।
ଏବେ ମେଳା ଚାଲିଥିବା ବେଳେ ସେହି ଅଞ୍ଚଳର ଯଶୋବନ୍ତ ଜେନା ଓ ତାଙ୍କ ପୁଅ ରଞ୍ଜନ ଜେନା ଜଣେ ଦୋକାନୀଙ୍କଠାରୁ ୫ଶହ ଟଙ୍କା ଦଇ କିଛି କିଣା କିଣି କରିଥିଲେ। ଦୋକାନୀଙ୍କର ସନ୍ଦେହ ହେବାରୁ ସେ ପୁଲିସକୁ ଏ ବିଷୟରେ ଜଣାଇଥିଲେ । ପୁଲିସ ଏହି ଦୁଇ ଅଭିଯୁକ୍ତଙ୍କୁ ଅଟକ ରଖି ପଚରା ଉଚରା କରିବାରୁ ତାଙ୍କ ନିକଟରୁ ୯ଟି ନକଲି ୫୦୦ ଟଙ୍କିଆ ନୋଟ ଜବତ ହୋଇଥିଲା । ଏହି ନୋଟ ଗୁଡିକୁ କମ୍ପୁଟର ଦୋକାନ କରିଥିବା ଶାନ୍ତିଶୀଳ ଷଡଙ୍ଗୀ ତାଙ୍କ ଦୋକାନରେ ଛାପୁଥିବା ସେମାନେ ପୁଲିସକୁ ସୂଚନା ଦେଇଥିଲେ । ପୁଲିସ ଚଢଉ କରି ଟଙ୍କା ଛପା ଯାଉଥିବା କମ୍ପୁଟର ଓ ପ୍ରିଣ୍ଟରକୁ ଜବତ କରିଛି । ଏଥିରେ ସମ୍ପୃକ୍ତ ରାଜକୁମାର ପାଣି ନାମକ ଅନ୍ୟତମ ଅଭିଯୁକ୍ତକୁ ପୁଲିସ ଗିରଫ କରିଥିବା ବେଳେ ମୁଖ୍ୟ ଅଭିଯୁକ୍ତ ଶାନ୍ତିଶୀଳ ଷଡଙ୍ଗୀ ଫେରାର ହୋଇଯାଇଛି । ଏବେ ପୁଲିସ ଏହି ନକଲି ଟଙ୍କା ଛପା ରାକେଟ ବିଷୟରେ ଅଧିକ ତଦନ୍ତ ଜାରି ରଖିଛି ।