ମୁମ୍ବଇ : ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ତଥା କ୍ୟାପଟେନ କୁଲ ଭାବେ ସୁପରିଚିତ ମହେନ୍ଦ୍ର ସିଂହ ଧୋନୀଙ୍କ ଉପରେ ଏକ ୱେବସିରିଜ୍ ‘ରୋର୍ ଅଫ୍ ଦ ଲାୟନ୍’ ନିର୍ମାଣ ହେବାକୁ ଯାଉଛି। କବିର ଖାନଙ୍କ ନିର୍ଦେଶନାରେ ଏହି ୱେବ ସିରିଜ ନିର୍ମାଣ ହେବ। ଏଥିରେ ୨୦୧୩ ଆଇପିଏଲରେ ଫିକ୍ସିଂ ଅଭିଯୋଗ, ଏହାକୁ ନେଇ ଚେନ୍ନାଇ ସୁପରକିଙ୍ଗସ୍ ଉପରେ ୨ ବର୍ଷର ପ୍ରତିବନ୍ଧକ ଏବଂ ୨୦୧୮ରେ ଦଳ ପୁର୍ବଭଳି ଆଇପିଏଲକୁ ଫେରିବା ଘଟଣା ସ୍ଥାନିତ ହୋଇଛି। ‘ରୋର୍ ଅଫ୍ ଦ ଲାୟନ୍’ରେ ସେସମୟର ଖେଳାଳୀମାନଙ୍କ ଅନୁଭୂତି ବିଶେଷକରି ଧୋନୀଙ୍କ ଉପରେ ବିତିଥିବା ଘଟଣାବଳୀକୁ ଦେଖାଯିବ। ଏହାଦ୍ୱାରା ଧୋନୀ ପୁଣି ଦର୍ଶକଙ୍କ ସହ ମନକଥା ସେୟାର କରିପାରିବେ।
୨୦୧୬ରେ ଧୋନୀଙ୍କ ଜୀବନ କାହାଣୀ ଉପରେ ଚଳଚ୍ଚିତ୍ର ‘ଏମ୍ଏସ୍ ଧୋନୀ: ଦ ଅନଟୋଲଡ୍ ଷ୍ଟୋରୀ’ ନିର୍ମାଣ ହୋଇଥିଲା । ସେଥିରେ ଧୋନୀଙ୍କ ପିଲାବେଳରୁ ଖେଳ ପ୍ରତି ଥିବା ଦୁର୍ବଳତା ଏବଂ ପରେ ଭାରତୀୟ କ୍ରିକେଟ ଦଳରେ ଯୋଗଦାନ ଓ ବ୍ୟକ୍ତିଗତ ଜୀବନ ଉପରେ ଅନେକ କିଛି ଦେଖାଯାଇଥିଲା।
