ପାରଳାଖେମୁଣ୍ଡି/ଧାମରା : ରାଜ୍ୟର ଭିନ୍ନ ଭିନ୍ନ ସ୍ଥାନରେ ବଜ୍ରପାତ ଘଟି ସୋମବାର ଜଣଙ୍କର ମୃତ୍ୟୁ ଘଟିଥିବା ବେଳେ ୨ ଜଣ ଆହତ ହୋଇଛନ୍ତି।
ସୋମବାର ସନ୍ଧ୍ୟାରେ ବଜ୍ରପାତ ଘଟି ଗଜପତି ଜିଲ୍ଲା କାଶୀନଗର ବ୍ଲକ ଅର୍ନ୍ତଗତ ସିଦ୍ଧମଙ୍ଗଡ ଗ୍ରାମପଞ୍ଚାୟତର ଅନିଲ ନୀଳାପୁ(୧୬)ଙ୍କର ମୃତ୍ୟୁ ଘଟିଛି। ଏହି ଘଟଣାରେ ଆଜୁ ଲିମା(୧୩) ନାମକ ଅନ୍ୟଜଣେ ବାଳକ ଆହତ ହୋଇଛି । ଆହାତ ବାଳକକୁ ପାରଳାଖେମୁଣ୍ଡି ଡାକ୍ତରଖାନାରେ ଭର୍ତ୍ତି କରାଯାଇଛି।
ସେହିପରି ଧାମରା ନିକଟସ୍ଥ ହବାଳି ଘାଟରେ ଚରଦିଆ ପଂଚାୟତର ଶୈଳେନ୍ଦ୍ର ପଲ୍ଲୀ ଗ୍ରାମର ରାମଚନ୍ଦ୍ର ଜେନାଙ୍କ ସାନପୁଅ ତପନ ଜେନା(୨୯) ସୋମବାର ଅପରାହରେ ଚୌଧୁରୀ ଘାଟ ନିକଟରେ ମାଛ ଧରୁଥିବା ବେଳେ ବଜ୍ରାଘାତ ହୋଇଥିଲା। ଫଳରେ ଡଙ୍ଗାଟି ଓଲଟି ପଡିଥିବା ବେଳେ ତପନ ଜେନା ମନ୍ତେଇ ନଦୀରେ ନିଖୋଜ ହୋଇ ଯାଇଛନ୍ତି। ଚୌଧୁରୀ ଘାଟର ଘାଟିଆ ଓ ଅନ୍ୟ କେତକ ମତ୍ସ୍ୟଜିବୀ ବୋଟ ନେଇ ନଦୀ ମଧ୍ୟରେ ଖୋଜାଖୋଜି କରିଥିବା ବେଳେ ଅଗ୍ନିଶମ ବିଭାଗ ଓ ସାମୁଦ୍ରିକ ଥାନା ଏବଂ ବାଂଶଡା ଥାନାକୁ ଖବର ଦିଆଯାଇଥିଲା। ଖବର ଲେଖା ହେବା ପର୍ଯ୍ୟନ୍ତ ତପନର କୌଣସି ପତ୍ତା ମିଳି ନହିଁ।