ଖୁଣ୍ଟା : ମୟୂରଭଞ୍ଜ ଜିଲାରେ ଶିକ୍ଷା ଓ ସ୍ୱାସ୍ଥ୍ୟ ବ୍ୟବସ୍ଥା ପ୍ରତି ରାଜ୍ୟ ସରକାର ଉଦାସୀନତା ମନୋଭାବ ଦେଖାଉଥିବା ପ୍ରତିବାଦରେ ମଙ୍ଗଳବାର ବିଜେପି ପକ୍ଷରୁ ବାର ଘଣ୍ଟିଆ ବନ୍ଦ ଡାକରା ଦିଆଯାଇଥିଲା। ମଙ୍ଗଳବାର ବର୍ଷା ଓ କୋହଲା ପାଗ ସତ୍ତ୍ବେ ବିଜେପିର ଖୁଣ୍ଟା ବ୍ଲକ ଓ ଗୋପବନ୍ଧୁ ନଗର ବ୍ଲକର କର୍ମକର୍ତ୍ତା ଓ କର୍ମୀମାନେ ଦିନ ତମାମ ବନ୍ଦ ପାଳନ କରିଥିବା ଦେଖା ଯାଇଥିଲା। ଜିଲାରେ ୪୦୩ ଡାକ୍ତରଙ୍କ ମଧ୍ୟରୁ ୨୨୦ ଡାକ୍ତର ପଦବୀ ଖାଲି ପଡିଥିବା ବେଳେ ୪୬ ଜଣଙ୍କୁ ଜିଲାରୁ ବଦଳି କରାଯିବା ଓ ଉତ୍ତର ଓଡିଶା ବିଶ୍ୱ ବିଦ୍ୟାଳୟକୁ ଉପେକ୍ଷା କରାଯାଇ ୟୁପିଏସସି କୋଚିଂ ସେଣ୍ଟର ଖୋଲା ନ ଯିବା ଘଟଣାର ତୀବ୍ର ପ୍ରତିବାଦ କରାଯାଇଥିଲା। ଗୋପବନ୍ଧୁ ନଗର ବ୍ଲକର ଖୁଣ୍ଟା ବଜାର ସମେତ, ପୁରୁଣା ବାରିପଦା, କୁଆମରା ଓ ଖୁଣ୍ଟା ବ୍ଲକର ଡୁକୁରା, ବାସିପିଠା, କହ୍ନେଇଁବନ୍ଧ, ବିସିପୁରରେ ଦୋକାନ ବଜାର ବନ୍ଦ ରହିଥିଲା। ସେହି ପରି ଉଭୟ ବ୍ଲକର ସରକାରୀ , ଅର୍ଦ୍ଧ ସରକାରୀ, ଘୋରୋଇ କାର୍ଯ୍ୟାଳୟ ଓ ଶିକ୍ଷାନୁଷ୍ଠାନ ବନ୍ଦ ରହିଥିଲା। ବିଜେପିର ଖୁଣ୍ଟା ବ୍ଲକର ୧୨ ନଂ ଜୋନ ସଭାପତି ସର୍ଦାର ହେମ୍ବ୍ରମ, ୧୩ ନଂ ଜୋନ ସଭାପତି ଭବାନୀ ଶଙ୍କର ଲେଙ୍କା, ଗୋପବନ୍ଧୁ ନଗର ବ୍ଲକର ୧୪ ନଂ ଜୋନର ସଭାପତି ଗୁରୁପ୍ରସାଦ ପ୍ରଧାନ, ୧୫ନଂ ଜୋନ ସଭାପତି ଶାନ୍ତନୁ ମଢୁଆଳ, ଯୁବ ସଭାପତି ହିମାଂଶୁ ଶେଖର ବେହେରାଙ୍କ ସମେତ ଦଳର ଅନ୍ୟ କର୍ମକର୍ତ୍ତା ମାନେ ବନ୍ଦର ନେତୃତ୍ୱ ନେଇଥିଲେ।
