ଅମିତାଭ ବଚ୍ଚନଙ୍କ ଟ୍ବିଟର ଆକାଉଣ୍ଟ ହ୍ୟାକ; ପ୍ରୋଫାଇଲ ଫଟୋ ବଦଳାଇ ଇମ୍ରାନଙ୍କ ଫଟୋ ରଖିଲେ ହ୍ୟାକର
ମୁମ୍ବଇ: ବଲିଉଡ୍ର କିମ୍ବଦନ୍ତୀ ଅଭିନେତା ଅମିତାଭ ବଚ୍ଚନଙ୍କ ଟ୍ବିଟର ଆକାଉଣ୍ଟ ହ୍ୟାକ୍ କରାଯାଇଛି। ହ୍ୟାକର ତାଙ୍କ ଆକାଉଣ୍ଟ ହ୍ୟାକ୍ କରିବା ପରେ ପ୍ରୋଫାଇଲ ଫଟୋ ପରିବର୍ତ୍ତନ କରି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଫଟୋ ରଖିଛନ୍ତି। ଏହା ସହ ସେଥିରେ ‘ଲଭ୍ ପାକିସ୍ତାନ’ ବୋଲି ଉଲ୍ଲେଖ କରିଛନ୍ତି। କିଏ ଅମିତାଭଙ୍କ ଆକାଉଣ୍ଟ ହ୍ୟାକ୍ କରିଛି ତାହା ଜଣାପଡ଼ି ନ ଥିଲେ ବି ଏହା ପଛରେ ପାକିସ୍ତାନୀ ହ୍ୟାକର୍ସଙ୍କ ହାତ ରହିଥିବା ସନ୍ଦେହ କରାଯାଉଛି। କିଏ ଏବଂ କେଉଁଠାରୁ ଅମିତାଭଙ୍କ ଆକାଉଣ୍ଟ ହ୍ୟାକ୍ କରାଯାଇଛି ସେ ନେଇ ମୁମ୍ବଇ ସାଇବର ସେଲ୍ ପକ୍ଷରୁ ତଦନ୍ତ କରାଯାଉଛି।
ଟ୍ବିଟର ଆକାଉଣ୍ଟ ହ୍ୟାକ୍ ପରେ ହ୍ୟାକର ଲେଖିଥିଲେ ଯେ, ଏହା ପୁରା ଦୁନିଆ ପାଇଁ ଏକ ଗୁରୁତ୍ଵପୂର୍ଣ୍ଣ ବାର୍ତ୍ତା। ତୁର୍କୀର ଫୁଟବଲ ଖେଳାଳିଙ୍କ ପ୍ରତି ଆଇଲାଣ୍ଡ ରିପବ୍ଲିକର ବ୍ୟବହାରକୁ ମୁଁ ନିନ୍ଦା କରୁଛି। ମୁଁ କହିଦେଉଛି ଯେ ଏକ ବଡ଼ ସାଇବର ଆକ୍ରମଣ ହେବାର ଅଛି। ଏହା ପରେ ହ୍ୟାକର ନିଜର ଲୋଗୋ ଶେୟାର କରିଛି। ଏହି ଘଟଣା ପରେ ମୁମ୍ବଇ ପୁଲିସର ମୁଖ୍ୟ ପିଆରଓ ଟ୍ବିଟ୍ କରି କହିଛନ୍ତି, ଅମିତାଭ ବଚ୍ଚନଙ୍କ ଟ୍ବିଟର ଆକାଉଣ୍ଟ ହ୍ୟାକ୍ କରାଯାଇଥିବା ନେଇ ସୂଚନା ମିଳିଛି। ଏହି ଘଟଣାର ତଦନ୍ତ କରାଯାଉଛି। ହ୍ୟାକର ଦ୍ବାରା କରାଯାଇଥିବା ସମସ୍ତ ଟ୍ବିଟ୍ ଅମିତାଭଙ୍କ ଆକାଉଣ୍ଟରୁ ହଟାଇ ଦିଆଯାଇଛି।
ସୂଚନାଯୋଗ୍ୟ, ଅମିତାଭ ବଚ୍ଚନ ସୋସିଆଲ ମିଡିଆରେ ଅଧିକ ସକ୍ରିୟ ରହିଥାନ୍ତି। ଅଧିକାଂଶ ସମୟରେ ସେ ଟ୍ବିଟର ଜରିଆରେ ନିଜର ଚିନ୍ତାଧାରା ଏବଂ ବିଚାର ଲୋକଙ୍କ ସହ ଶେୟାର କରିଥାନ୍ତି। ଟ୍ବିଟରରେ ଅମିତାଭଙ୍କର ୩ କୋଟି ୭୦ ଲକ୍ଷ ଫଲୋଅର ରହିଛନ୍ତି। ଏହା ପୂର୍ବରୁ ୨୦୧୫ରେ ଅମିତାଭଙ୍କ ଟ୍ବିଟର ଆକାଉଣ୍ଟ ହ୍ୟାକ କରାଯାଇଥିଲା।
Comments are closed.