ପିଓକେରେ ଭାରତର ବିମାନ ଆକ୍ରମଣ, ବୋମାମାଡ଼ରେ ବହୁ ଆତଙ୍କବାଦୀ ଶିବିର ଧ୍ଵଂସ

0

ପୁଲୱାମା ଆତଙ୍କବାଦୀ ଆକ୍ରମଣର ପ୍ରତିଶୋଧ ସ୍ବରୂପ ଭାରତ ପକ୍ଷରୁ ମଙ୍ଗଳବାର ଏକ ବଡ଼ ଧରଣର କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ପାକିସ୍ତାନ ଅଧିକୃତ କାଶ୍ମୀର(ପିଓକେ)ରେ ଭାରତୀୟ ବାୟୁସେନା ପକ୍ଷରୁ ବିମାନ ଆକ୍ରମଣ କରାଯାଇଛି। ଏହି ଅଞ୍ଚଳରେ ଥିବା ଆତଙ୍କବାଦୀ ଶିବିରଗୁଡ଼ିକ ଉପରେ ଆକାଶମାର୍ଗରୁ ବୋମାମାଡ଼ କରାଯାଇଛି। ଫଳରେ ବାଲାକୋଟ ଏବଂ ଚାକୋଠି ସମେତ ମୁଜାଫରବାଦରେ ଥିବା ବହୁ ଆତଙ୍କବାଦୀ ଶିବିର ଧ୍ଵଂସ ହୋଇଥିବା ସୂଚନା ମିଳିଛି। ଏସବୁ ଶିବିର ଜୈଶ ଆତଙ୍କବାଦୀ ସଂଗଠନର ବୋଲି ଜଣାପଡ଼ିଛି।

ଏ ସମ୍ପର୍କରେ ପ୍ରତିରକ୍ଷା ମନ୍ତ୍ରଣାଳୟ କିମ୍ବା ବୈଦେଶିକ ମନ୍ତ୍ରଣାଳୟ ପକ୍ଷରୁ କୌଣସି ସୂଚନା ଦିଆଯାଇ ନ ଥିଲେ ମଧ୍ୟ ଭାରତୀୟ ବାୟୁସେନା ସୂତ୍ର ଅନୁଯାୟୀ ଯୁଦ୍ଧ ବିମାନଗୁଡ଼ିକ ପାଖାପାଖି ୧୦୦୦ କିଲୋଗ୍ରାମ ଓଜନର ବୋମା ପକାଇଥିବା ଜଣାପଡ଼ିଛି। ରାତି ୩ଟା ୩୦ରୁ ଏହି ଅପରେଶନ ଆରମ୍ଭ ହୋଇଛି। ଏଥିରେ ଆକ୍ରମଣରେ ୧୨ଟି ମିରେଜ ୨୦୦୦ ଲଢ଼ୁଆ ଯୁଦ୍ଧ ବିମାନ ସାମିଲ ହୋଇଛନ୍ତି। ଆକ୍ରମଣ ଫଳରେ ନିୟନ୍ତ୍ରଣ ରେଖା ଆରପଟେ ଥିବା ପିଓକେରେ ବହୁ ସଂଖ୍ୟକ ଆତଙ୍କୀ ଶିବିର ଧ୍ଵଂସ ପାଇଛି। ଭାରତର ବୈଦେଶିକ ସଚିବ ରବୀଶ କୁମାର ଏ ନେଇ କୌଣସି ମତାମତ ଦେବାକୁ ମନା କରିଦେଇଛନ୍ତି। ଅନ୍ୟପଟେ ଆକ୍ରମଣକୁ ସ୍ବୀକାର କରିଛନ୍ତି ପାକିସ୍ତାନ ମେଜର ଜେନେରାଲ ଆସିଫ ଘଫୁର। ସେ ଟୁଇଟ କରି କହିଛନ୍ତି ଯେ, ଭାରତୀୟ ଯୁଦ୍ଧ ବିମାନ ଦୁଇଦେଶର ସୀମାକୁ ଉଲ୍ଲଂଘନ କରି ଆକ୍ରମଣ କରିଛି। ଏଥିସହ ସେ ଆକ୍ରମଣର କେତେକ ଫଟୋଚିତ୍ର ଟୁଇଟରରେ ପୋଷ୍ଟ କରିଛନ୍ତି।

Leave A Reply