ଇସ୍ତଫା ଦେଲେ ଆଲୋକ ବର୍ମା

0
184

ନୂଆଦିଲ୍ଳୀ: ସିବିଆଇ ନିର୍ଦେଶକ ପଦରୁ ହଟିବାର ୨୪ ଘଣ୍ଟା ନ ପୁରୁଣୁ ଆଲୋକ ବର୍ମା ଇସ୍ତଫା ଦେଇଛନ୍ତି। ସିବିଆଇ ନିର୍ଦେଶକ ପଦରୁ ହଟାଇବା ପାଇଁ ଗୁରୁବାର ସନ୍ଧ୍ୟାରେ ଉଚ୍ଚକ୍ଷମତା ସମ୍ପନ୍ନ କମିଟି ନିଷ୍ପତ୍ତି ନେଇଥିଲେ।
ସୂଚନାଯୋଗ୍ୟ, ସିବିଆଇର ନିର୍ଦେଶକ ପଦରେ ଥିବା ବେଳେ ଆଲୋକ ବର୍ମା ଓ ଅତିରିକ୍ତ ନିର୍ଦ୍ଦେଶକ ରାକେଶ ଆସ୍ଥାନାଙ୍କ ମଧ୍ୟରେ ମତଭେଦ ହୋଇଥିଲା। ଦୁହେଁ ଦୁହିଁଙ୍କ ବିରୋଧରେ ଦୁର୍ନୀତି ଅଭିଯୋଗ ଆଣିବା ପରେ ଗତ ଅକ୍ଟୋବର ମାସରେ ଦୁଇ ଜଣଙ୍କୁ କେନ୍ଦ୍ର ସରକାର ବାଧ୍ୟତାମୂଳକ ଛୁଟିରେ ପଠାଇ ଦେଇଥିଲେ। ଏହି ନିଷ୍ପତ୍ତି ବିରୋଧରେ ଦୁଇ ଅଧିକାରୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଗତ ୮ ତାରିଖରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କ ଛୁଟି ନିର୍ଦେଶକୁ ରଦ୍ଦ କରିବା ସହିତ ଶ୍ରୀ ବର୍ମାଙ୍କ ବିରୋଧରେ ଆସିଥିବା ଦୁର୍ନୀତି ସମ୍ପର୍କରେ ୭ ଦିନ ମଧ୍ୟରେ ନିଷ୍ପତ୍ତି ନେବା ପାଇଁ ଉଚ୍ଚକ୍ଷମତା ସମ୍ପନ୍ନ କମିଟିକୁ ନିର୍ଦେଶ ଦେଇଥିଲେ। ଗୁରୁବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସୁପ୍ରିମକୋର୍ଟ ବିଚାରପତି ଏ କେ ସିକ୍ରି ଓ ବିରୋଧୀ ଦଳ ନେତା ମଲ୍ଲିକାର୍ଜ୍ଜୁନ ଖାର୍ଗେଙ୍କୁ ନେଇ ଅନୁଷ୍ଠିତ ଉଚ୍ଚକ୍ଷମତାସମ୍ପନ୍ନ କମିଟି ଆଲୋକ ବର୍ମାଙ୍କୁ ସିବିଆଇ ନିର୍ଦେଶକ ପଦରୁ ହଟାଇ ନାଗରିକ ସୁରକ୍ଷା, ଅଗ୍ନିଶମ ସେବା ଓ ଗୃହରକ୍ଷୀ ସେବାର ମହାନିର୍ଦେଶକ ପଦରେ ଅବସ୍ଥାପିତ କରିଥିଲେ। ଏହି ନୂଆ ନିଯୁକ୍ତି ଘୋଷଣାର ୨୪ ଘଣ୍ଟା ମଧ୍ୟରେ ଶ୍ରୀ ବର୍ମା ଇସ୍ତଫା ଦେଇଛନ୍ତି।