ଲକ୍ଷ୍ନୌ : ଉତ୍ତରପ୍ରଦେଶର ଯୋଗୀ ଆଦିତ୍ୟନାଥଙ୍କ ନେତୃତ୍ବ ସରକାର ଆଲ୍ଲାହାବାଦ ବିଶ୍ବବିଦ୍ୟାଳୟର ନାମ ପରିବର୍ତ୍ତନ କରି ପ୍ରୟାଗରାଜ ବିଶ୍ବବିଦ୍ୟାଳୟ ରଖିବାକୁ ନିଷ୍ପତ୍ତି ନେଇଛନ୍ତି। ବିଶ୍ବବିଦ୍ୟାଳୟ ନାମ ପରିବର୍ତ୍ତନ ସମ୍ପର୍କରେ କୁଳପତି ରାଜ୍ୟ ସରକାରଙ୍କ ନିକଟକୁ ପ୍ରସ୍ତାବ ପଠାଇଛନ୍ତି। ପ୍ରସ୍ତାବକୁ ରାଜ୍ୟ ସରକାରଙ୍କ ଅନୁମୋଦନ ପରେ ଏହାର ରାଜ୍ୟପାଳଙ୍କ ନିକଟକୁ ପଠାଯିବ। ଉପମୁଖ୍ୟମନ୍ତ୍ରୀ ଦିନେଶ ଶର୍ମା କହିଛନ୍ତି ଯେ ଆଲ୍ଲାହାବାଦ ଜିଲାର ନାମ ପରିବର୍ତ୍ତନ ହୋଇ ପ୍ରୟାଗରାଜ ରଖାଯିବା ପରେ ଜିଲାର ସମସ୍ତ ଅନୁଷ୍ଠାନର ନାମକୁ ଅନୁରୂପ ଭାବେ ପରିବର୍ତ୍ତନ ପାଇଁ ଦାବି ହୋଇଛି। ରାଜ୍ୟ ସରକାର ରାଜ୍ୟର ଦୁଇଟି ଜିଲା ଆହ୍ଲାବାଦ ଓ ଫୈଜାବାଦର ନାମ ପରିବର୍ତ୍ତନ କରି ପ୍ରୟାଗରାଜ ଓ ଅଯୋଧ୍ୟା ରଖିଛନ୍ତି। ଜିଲାର ନାମ ପରିବର୍ତ୍ତନ ନିଷ୍ପତ୍ତିକୁ ହାଇକୋର୍ଟରେ ଚାଲେଞ୍ଜ କରାଯାଇଥିବାବେଳେ ଏହାକୁ ଅଗ୍ରାହ୍ୟ କରିଦିଆଯାଇଛି। ବିଜେପି ବିଧାୟକ ସଙ୍ଗୀତ ସୋମ ମୁଜାଫରନଗର ଜିଲାର ନାମ ପରିବର୍ତ୍ତନ କରି ଲକ୍ଷ୍ମୀନଗର ରଖିବାକୁ ଦାବି କରିଛନ୍ତି। ଆଗ୍ରାର ନାମ ପରିବର୍ତ୍ତନ କରି ଅଗ୍ରାୱାନ ରଖିବାକୁ ଅନ୍ୟତମ ବିଧାୟକ ଜଗନ ପ୍ରସାଦ ଗାର୍ଗ ଦାବି କରିଛନ୍ତି।
