ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ଫଟୋର ଦୁରୁପୋଯୋଗ କଲେ ୬ ମାସ ଜେଲ୍‌

ନୂଆଦିଲ୍ଲୀ: ପ୍ରଧାନମନ୍ତ୍ରୀ କିମ୍ବା ରାଷ୍ଟ୍ରପତିଙ୍କ ଫଟୋକୁ ଦୁରୁପୋଯୋଗ କଲେ ଏଣିକି ୬ମାସ ପର୍ଯ୍ୟନ୍ତ ଜେଲ୍‌ ଦଣ୍ଡ ମିଳିବବ। କିଛି ଘରୋଇ କମ୍ପାନୀ ନିଜର ବିଜ୍ଞାପନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଫଟୋ ବ୍ୟବହାର କରିବା ପରେ କେନ୍ଦ୍ର ସରକାର ଏ ନେଇ ସଚେତନ ହୋଇଛନ୍ତି। କେନ୍ଦ୍ର ସରକାର ପ୍ରତୀକ ଏବଂ ନାମ(ଅନୁଚିତ ବ୍ୟବହାର ନିବାରଣ) ଆଇନ-୧୯୫୦ରେ ପ୍ରଥମ ଥର ଲାଗି ଦଣ୍ଡ ବିଧାନ ବ୍ୟବସ୍ଥା ଆଣିବାକୁ ଯାଉଛନ୍ତି। ଏହା ସହିତ ଜରିମାନା ପରିମାଣ ୧ ହଜାର ଗୁଣ ବୃଦ୍ଧି କରି ୫ ଲକ୍ଷ କରାଯିବ।

ଉପଭୋକ୍ତା ବ୍ୟାପାର ମନ୍ତ୍ରଣାଳୟ ୭ଦଶନ୍ଧି ତଳର ଆଇନରେ ସଂଶୋଧନ କରିବାକୁ ଡ୍ରାଫ୍ଟ ପ୍ରସ୍ତୁତ କରିଛନ୍ତି। ଆଇନ ମନ୍ତ୍ରଣାଳୟ ଏହାକୁ ମଞ୍ଜୁରୀ ପ୍ରଦାନ କରିଛି। ସଂସଦର ଶୀତକାଳୀନ ଅଧିବେଶନରେ ଏହାକୁ ପାରିତ କରିବାକୁ ସରକାର ଉଦ୍ୟମ କରୁଛନ୍ତି। ସୂଚନାଯୋଗ୍ୟ, ଚଳିତବର୍ଷ କେତେକ ଘରୋଇ କମ୍ପାନୀ ନିଜର ବିଜ୍ଞାପନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଫଟୋକୁ ବ୍ୟବହାର କରିଥିଲେ। ଏହାକୁ ନେଇ ବିବାଦ ସୃଷ୍ଟି ହୋଇଥିଲା। ଫଳରେ ସରକାର ଦେଶର ଦୁଇଟି ବଡ଼ କମ୍ପାନୀ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। କିନ୍ତୁ ଆର୍ଥିକ ଜରିମାନା ବହୁତ କମ୍‌ ଥିବାରୁ ଆଇନରେ ସଂଶୋଧଣ ଆଣିବାକୁ ସରକାର ପ୍ରସ୍ତୁତ ହୋଇଛନ୍ତି।