କଟକ : ବିଶିଷ୍ଟ ସାହିତ୍ୟ ସାଧିକା ଅଧ୍ୟାପିକା ଡକ୍ଟର ଅର୍ଚ୍ଚନା ନାୟକ ଚଳିତ ବର୍ଷର ପ୍ରଥମ ମର୍ୟ୍ୟାଦାଜନକ ‘ସତ୍ୟବାଦୀ ସାରସ୍ୱତ ସମ୍ମାନ’ ପାଇବାକୁ ଯୋଗ୍ୟ ବିବେଚିତ ହୋଇଛନ୍ତି। ଓଡ଼ିଆ ସାହିତ୍ୟରେ ଜୀବନବ୍ୟାପୀ ସାଧନା ପାଇଁ ତାଙ୍କୁ ଏହି ପୁରସ୍କାର ବାବଦରେ ଏକଲକ୍ଷ ଟଙ୍କାର ଉପାୟନ ପ୍ରଦାନ କରାଯିବ।
ଏତଦ୍ବ୍ୟତୀତ ପ୍ରବନ୍ଧରେ ଡ. ସୌଦାମିନୀ ନନ୍ଦ, କବିତାରେ ଆଶୁତୋଷ ପରିଡ଼ା ଏବଂ ଗଳ୍ପରେ ଅରବିନ୍ଦ ଦାସ ଚଳିତ ବର୍ଷର ସତ୍ୟବାଦୀ ସାହିତ୍ୟ ସମ୍ମାନ ପାଇବେ। ପ୍ରତ୍ୟେକଙ୍କୁ ପୁରସ୍କାର ବାବଦରେ ୧୦ ହଜାର ଟଙ୍କାର ଉପାୟନ ପ୍ରଦାନ କରାଯିବ। ଚଳିତବର୍ଷ ଏପ୍ରିଲ ୧ ତାରିଖରେ କଟକ ବିଜୁ ପଟ୍ଟନାୟକ ଛକସ୍ଥିତ ସାରଳା ଭବନରେ ପୂର୍ବାହ୍ଣ ୯.୩୦ରେ ଅନୁଷ୍ଠିତ ହେବାକୁଥିବା ‘ଗୋପବନ୍ଧୁଙ୍କ ସତ୍ୟବାଦୀ’ର ଦ୍ୱିତୀୟ ପ୍ରତିଷ୍ଠା ଦିବସ ଅବସରରେ ଏହି କୃତୀ ସାହିତ୍ୟିକମାନଙ୍କୁ ସମ୍ମାନିତ କରାଯିବ।
ଓଡ଼ିଆ ସାହିତ୍ୟ ଜଗତରେ ସ୍ୱଳ୍ପ ସମୟ ମଧ୍ୟରେ ବେଶ୍ ଲୋକପ୍ରିୟତା ଅର୍ଜନ କରିଥିବା ‘ଗୋପବନ୍ଧୁଙ୍କ ସତ୍ୟବାଦୀ’ ପକ୍ଷରୁ କଟକ ଗୋପବନ୍ଧୁ ଭବନ ସ୍ଥିତ ‘ସମାଜ’ ପରିସରରେ ଅନୁଷ୍ଠିତ ଏକ ବୈଠକରେ ଦକ୍ଷ ବିଚାରକମଣ୍ଡଳୀଙ୍କ ଦ୍ୱାରା ଏହି କୃତୀ ସାହିତ୍ୟିକମାନଙ୍କୁ ମନୋନୀତ କରାଯାଇଅଛି।
